Trajtimi kirurgjikal i kancerit të pankreasit!

Trajtimi kryesor i kancerit të pankreasit është ai kirurgjikal. Ky trajtim ndryshon sipas pjesës në të cilën ndodhet tumori. Nëse tumori gjëndet në kokën e pankreasit kryhet operacioni i ashtuquajtur Whipple (pankreatikoduodenektomi) gjatë të cilit hiqet bashkë me kokën e pankreasit edhe zorra 12 gishtore, tëmthi dhe një pjesë e stomakut (kjo është opsion sipas rastit).

Nëse tumori ndodhet në trupin e pankreasit ose në bishtin e tij atëherë kryhet operacioni ‘’distal pankreatektomi’’ ku hiqet trupi i pankreasit bashkë me shpretkën (në disa raste edhe mund të ruhet). Në raste më të rralla mund të duhet heqja komplet e pankreasit. Këto operacione mund të bëhen të hapura ose me teknikë të mbyllur (laparoskopi). Nëse sëmundja nuk është përhapur jashtë pankreasit në organe të tjera dhe nëse pacienti mund ta përballojë operacionin themi se ndërhyrja kirurgjikale është e vetmja mundësi kurimi për këtë lloj sëmundje .

Në rastin kur sëmundja nuk ka prekur organe të tjera jashtë pankreasit porse në zonën ku ndodhet shihet e avancuar (kjo ka lidhje me afërsinë apo prekjen e damarëve kryesore të zorrëve që kalojnë poshtë pankreasit) atëherë pacienti duhet të marri kimioterapi përpara operacionit. Ky vendim duhet marrë duke u këshilluar me kirurgun onkolog.

Mos të harrojmë se në rastet kur pacienti duhet të operohet , operacioni i parë që do ti nënshtrohet është ai me kryesori dhe ai i cili do të ndikojë në ecurinë e sëmundjes. Qëllimi i operacionit duhet të jetë pastrimi komplet i tumorit duke mos lënë asnjë pjesë tumorale në kufijtë e organit qoftë makroskopike (që shihet me sy) apo mikroskopike (të vërtetuar nga patologu në mikroskop).

Mundohuni që operacioni të kryhet nga kirurgë të specializuar të kësaj fushe.