Si duhet të veprojmë me një nishan që dyshojmë se është kanceroz?

Nëse dyshojmë se një nishan ka karakteristika të natyrës kanceroze, hapi i parë është të bëjmë një vizitë dhe të konsultohemi me një mjek dermatolog ose një kirurg onkolog. Nëse mjeku ka dyshime, atëherë nevojitet një biopsi për të përcaktuar natyrën e nishanit, pasi trajtimi do të ndryshojë në varësi të rezultatit të biopsisë.

Në rast dyshimi për kancer, nuk është e këshillueshme të përdorim medikamente – qofshin ato bimore apo të një lloji tjetër – pa e përcaktuar më parë me siguri diagnozën.
Ndër tre llojet kryesore të kancerit të lëkurës, më i shpeshti është karcinoma me qeliza bazale, e cila zakonisht nuk përhapet në organe të tjera. Për këtë arsye, mjafton heqja e nishanit me kufij të shëndetshëm, pa pasur nevojë për pastrim të gjendrave limfatike apo kryerjen e një PET-skaneri për të kontrolluar përhapjen e mundshme.

Nëse analiza patologjike konfirmon kancer melanoma ose karcinomë me qeliza skuamoze, hapi i parë është të kontrollohet nëse kanceri është përhapur në pjesë të tjera të trupit. Nëse ka metastaza, një operacion agresiv në lëkurë apo në gjendrat limfatike humbet efektivitetin e tij si trajtim kryesor dhe ia lë vendin medikamenteve kuruese të përcaktuara nga nga mjeku onkolog.

Gjithashtu, para se të fillojë trajtimi – qoftë kirurgjikal apo jo – dermatologu kryen një kontroll të plotë të trupit me dermatoskop. Kjo bëhet për të identifikuar çdo nishan tjetër të dyshimtë, i cili mund të kërkojë trajtim në të njëjtën seancë.