Përse përdoren tubat e shkarkimit në bark

Drenat janë tuba plastikë që vendosen në pjesën e operacionit, psh të barkut, për disa arsye. 

Një nga arsyet themelore të vendosjes së tubave (dren) në zonën operative është zbrazja e lëngjeve të grumbulluara pas operacionit. Një arsye tjetër është se këto tuba i japin informacion kirurgut rreth situatës brenda fushës së operacionit. Ngjyra dhe sasia, e nganjëherë era e përmbajtjes së tubit, jep informacion me vlerë rreth asaj që po ndodh përbrenda. 

Një tjetër rol që luajnë këta tuba është në raste komplikacioni si psh hemoragjie ose rrjedhje prej qepjeve të organeve (psh zorrëve). Një pjesë e mirë e këtyre rrjedhjeve si psh lëngu i bilës, gjaku, përmbajtja e zorrëve, urina etj janë irrituese për cipën e barkut dhe nësë grumbullohen në bark japin komplikacione të rënda. Nxjerrja jashtë e tyre në mënyrë të sigurt shpëton jetën e pacientit në raste të caktuara. 

Kohëzgjatja e mbajtjes së tyre ndryshon nga lloji i operacionit, nga sasia që vjen dhe nëse ka patur ose jo komplikacione. Vendosja ose jo e tyre është në iniciativën e kirurgut sipas rrethanave dhe operacionit të kryer.